گوتەبێژی UN لەبارەی گرژییەکانی حەلەب: هانی لایەنەکان دەدەین گفتوگۆ بکەن
گوتەبێژی سکرتێری گشتیی نەتەوە یەکگرتووەکان لەبارەی شەڕ و ئاڵۆزی لە گەڕەکەکانی شێخ مەقسوود و حەلەب و بەنی زەید دەڵێت: ئاگاداری گرژییەکانی حەلەبین، هانی هەموو لایەنەکان دەدەین گفتوگۆ بکەن.
ئاگاداری نەتەوە یەکگرتووەکان لە گرژییەکان
ستیفان دوژاریک، گوتەبێژی سکرتێری گشتیی نەتەوە یەکگرتووەکان رایگەیاند: ئەو ڕاپۆرتانەمان بینیون لەبارەی زیادبوونی گرژییەکان هەن، هەروەها ئاگاداری راپۆرتەکانی نەبوونی پێشڤەچوونین لە نێوان حکومەتی سووریا و هێزەکانی سووریای دیموکرات هەن.
دەستپێکی شەڕەکان و قوربانییەکان
رۆژی سێشەممە 6ی 1ی 2026 شەڕ و ئاڵۆزی لە گەڕەکەکانی شێخ مەقسوود و ئەشرەفیەی حەلەب لە نێوان هێزەکانی سەر بە حکومەتی سووریا و هەسەدە روویدا. ئاسایشی نێوخۆی حەلەب سەر بە بەڕێوەبەرایەتیی خۆسەر رایگەیاندووە کە سێ کەس گیانیان لەدەستداوە و 26 کەسی دیکەش بریندار بوون.
رۆڵی نەتەوە یەکگرتووەکان لە هاندانی گفتوگۆ
لەبارەی رۆڵی نەتەوە یەکگرتووەکان لە گفتوگۆکانی نێوان هەسەدە و حکومەتی سووریا، گوتەبێژەکەی سکرتێری گشتیی نەتەوە یەکگرتووەکان دەڵێت: ئێمە بەردەوام دەبین لەوەی کردوومانە، هەرچی لەدەستمان بێت بۆ هاندانی لایەنەکان تاوەکو بەردەوام بن لە گفتوگۆ، دەیکەین.
دەشڵێت: ئەو هەنگاوە (دانوستاندنەکان) پێویستی بە یەکخستنی دەزگە ئەمنییەکان هەیە لەپێناو بەرژەوەندی هەموو سووریەکان، ئێمەش بەردەوام ئامادە دەبین بۆ کارکردن بەو ئاراستەیەدا.
تۆمەت و تۆمەتبارکردنی دوو لایەن
بەرپرسانی بەڕێوەبەرایەتی خۆسەر گرووپەکانی سەر بە حکومەت بە پێشێلکردنی رێککەوتنیان لەگەڵ حکومەتی سووریا دادەنێن. بەڕێوەبەرایەتی خۆسەر رایگەیاندووە: گرووپەکانی سەر بە حکومەتی دیمەشق بە هەموو جۆرە چەکێکی قورس هێرشیان کردووەتە سەر گەڕەکەکانی شێخ مەقسوود، ئەشرەفییە و بەنی زەید.
لە بەرامبەردا وەزارەتی بەرگریی سووریا هەسەدە بە زیادبوونی گرژییەکان و هێرشکردن تۆمەتبار دەکات.
هەڵوێستی UN سەبارەت بە خۆپێشاندانەکانی ئێران
گوتەبێژی سکرتێری گشتی نەتەوە یەکگرتووەکان لەبارەی خۆپێشاندانەکانی ئێرانیش دەڵێت: زۆر روون بووین لە دەربڕینی نیگەرانییەکانی سکرتێری گشتی سەبارەت بەو تووندوتیژییانەی بینیمان، نەبوونی توانای خەڵک بۆ ئەوەی بتوانن بە ئازادانە و ئاشتییانە رای خۆیان دەربڕن.
